கார மிக்ஸர் – 1

 
தேவையான பொருள்கள்:

அவல் – 3 கப்
கடலைப் பருப்பு – 1/2 கப்
பயத்தம் பருப்பு –  1 கப்
நிலக்கடலை – 1 கப்
பொட்டுக் கடலை – 1 கப்
முந்திரிப் பருப்பு – 1 கப்
கறிவேப்பிலை – 4 ஈர்க்கு
உப்பு – தேவையான அளவு
காரப் பொடி – தேவையான அளவு
பெருங்காயம் – 1/4 டீஸ்பூன்
எண்ணெய் – பொரிக்க
ஓமப்பொடி (அல்லது காராபூந்தி) – 1 1/2 கப்

 

செய்முறை:

  • கடலைப்பருப்பு, பயத்தம் பருப்பை தண்ணீரில் இரண்டு மணி நேரம் ஊறவைத்து ஒரு துணியில் உலர்த்திக் காயவைக்கவும். (முழுவதும் காய்ந்திருக்கவேண்டியதில்லை.)
  • முந்திரிப்பருப்பை நாலைந்தாக உடைத்துக் கொள்ளவும்.
  • அடுப்பில் வாணலியில் எண்ணெய் வைத்து, காய்ந்ததும் துளைகளுள்ள ஒரு வடிகட்டி (பெரிய டீ வடிகட்டி, புளி வடிகட்டி) எடுத்து, அதில் கடலைப்பருப்பு, பயத்தம் பருப்பு, நிலக்கடலை, பொட்டுக்கடலை, முந்திரிப்பருப்பை ஒவ்வொன்றாக, தனித்தனியாக போட்டு, பொரித்து, வடித்தட்டில் போட்டு எண்ணெயை வடிக்கவும்..
  • அவலை முதலிலேயே அந்த வடிகட்டியில் (மாவு, உடைந்த அவல் இல்லாமல்) சலித்துவைத்திருக்கவேண்டும்; கொஞ்சம் கொஞ்சமாகப் போட்டு, பொரித்து எடுக்கவும். சிறிது மஞ்சள் தூள் சேர்த்து நன்கு கலந்துகொள்ளவும்.
  • சிறிது கடலைமாவில் உப்பு, பெருங்காயம், மிளகாய்த் தூள் சேர்த்துக் கலந்து காராபூந்தி அல்லது ஓமப்பொடி அச்சில் பிழிந்துகொள்ளலாம். (மிக்ஸரில் கடலைமாவு சேர்த்த பொருள் இல்லாவிட்டால் சுவைகூடி வராது. அதனால் ஏதாவது ஒன்றாவது செய்து சேர்க்கலாம்; அல்லது அதைமட்டும் கடையில் வாங்கிச் சேர்த்துக்கொள்ளலாம்.)
  • எல்லாவற்றையும் ஒரு வாயகன்ற பெரிய பாத்திரத்தில் போட்டுக்கொண்டே வரவும்.
  • கடைசியில் கறிவேப்பிலையையும் பொரித்து, வடிகட்டவும்.
  • பொரித்த கறிவேப்பிலையுடன் தேவையான உப்புப் பொடி, மிளகாய்ப் பொடி, பெருங்காயம் சேர்த்து நன்கு கையால் நொறுக்கி, அந்தக் கலவையை நன்கு கலக்கவும்.

* எண்ணெயில் பொரிக்கும்போது தீ மிகக் குறைவாக இருந்தால் பருப்புகள், அவல் கடுக்’கென்று ஆகிவிடும். தீ அதிகமாக இருந்தால் கருகிவிடும். மிதமான தீயில் அடுப்பு எரியவேண்டும். அவல் போட்டதுமே பொரிந்துவிடவேண்டும்.

* விரும்புபவர்கள் வேறு மசாலாப் பொடிகளும் சேர்க்கலாம். ஆனால் இதுவே அதிகம் படுத்தாத வகை.

தேவையான பொருள்கள்:

உளுத்தம் பருப்பு – 1 கப்
இஞ்சி – சிறு துண்டு
மிளகு – 2 டீஸ்பூன்
உப்பு – தேவையான அளவு
எண்ணெய்
கறிவேப்பிலை
கொத்தமல்லித் தழை

செய்முறை:

  • உளுத்தம் பருப்பை அரை மணி நேரம் ஊறவைத்து கறிவேப்பிலை, கொத்தமல்லி, இஞ்சி, மிளகு சேர்த்து கெட்டியாக அரைத்துக் கொள்ளவும்.
  • வாணலியில் எண்ணெய் காய்ந்ததும் சின்ன வடைகளாகத் தட்டி, நடுவில் துளையிட்டு எண்ணெயில் பொரித்தெடுக்கவும்.

தேவையான பொருள்கள்:

பச்சரிசி – 2 கப்
மிளகு – 2 டேபிள்ஸ்பூன்
சீரகம் – 2 டீஸ்பூன்
கடலைப் பருப்பு – ஒரு கைப்பிடி
உப்பு – தேவையான அளவு
எண்ணெய்

செய்முறை:

  • அரிசியை மிக்ஸியில் அரைத்து மாவாக்கி, வறுத்துக் கொள்ளவும்.
  • மிளகு, சீரகத்தை ஒன்றிரண்டாக உடைத்துக் கொள்ளவும்.
  • கடலைப் பருப்பை ஊறவைத்து மிக்ஸியில் ரிவர்ஸில் லேசாக உடைத்துக் கொள்ளவும்.
  • அரிசி மாவில் உப்புடன் நல்ல சூடான வெந்நீரை சிறிது சிறிதாக விட்டு கெட்டியாகப் பிசையவும்.
  • ஒன்றிரண்டாக உடைத்த மிளகு, சீரகம், கடலைப் பருப்பு, விரும்பினால் சிறிது கேசரிப் பவுடர் சேர்த்துப் பிசையவும்.
  • எண்ணை தடவிய வாழையிலை அல்லது பிளாஸ்டிக் பேப்பரில் மெல்லிய வட்டங்களாகத் தட்டி, எண்ணெயில் பொரித்தெடுக்கவும்.

தேவையான பொருள்கள்:

தோல் உளுத்தம் பருப்பு – 1 கப்
கடலைப் பருப்பு – 1/4 கப்
மிளகு – 2 டீஸ்பூன்
சீரகம் – 2 டீஸ்பூன்
அரிசி – 2 டீஸ்பூன்
பெருங்காயம்
உப்பு – தேவையான அளவு
எண்ணெய்

செய்முறை:

  • கருப்புத் தோலுடன் கூடிய உளுத்தம் பருப்பு, கடலைப் பருப்பை அரை மணிக்கு மேல் நீரில் ஊறவைக்காமல் நீரை வடித்துவிடவும்.
  • அரிசி, மிளகு, சீரகம், பெருங்காயம், உப்பு சேர்த்து கிரைண்டரில் மட்டுமே கெட்டியாக, கையால் தள்ளிவிட்டுக் கொண்டே தண்ணீர் விடாமல் அரைக்கவும்.
  • ஒரு எண்ணெய் தடவிய பிளாஸ்டிக் பேப்பரில் மெல்லிய வடைகளாகத் தட்டிக் கொள்ளவும்.
  • வாணலியில் எண்ணை வைத்து, காய்ந்ததும், வடை நடுவில் துளை போட்டு பேப்பரிலிருந்து எடுத்து எண்ணையில் போட்டு பொரித்தெடுக்கவும்.

* இது சில நாள்களுக்குக் கூட கெடாது. அநேகமான கோயில்களில் இப்படியே செய்வார்கள்.

* உளுத்தம் பருப்பு மட்டுமே எடுத்து மேலே சொன்ன மாதிரி மெல்லிய வடைகளாகத் தட்டினால், மேலும் அதிக நாள்களுக்கு வரும்.

தேவையான பொருள்கள்:

புழுங்கல் அரிசி – 1/2 கப்
கடலைப் பருப்பு – 1/2 கப்
துவரம் பருப்பு – 1/2 கப்
உளுத்தம் பருப்பு – 1/8 கப்
காய்ந்த மிளகாய் – 4
இஞ்சி – 1 சிறுதுண்டு
பச்சை மிளகாய் – 4
தேங்காய்த் துருவல் – 1/2 கப்
பெருங்காயம்
உப்பு – தேவையான அளவு.

thavalai vadai 3

செய்முறை: 

  • புழுங்கல் அரிசியையும் பருப்புகளையும் ஒன்றாகக் கலந்து தண்ணீரில் ஒருமணி நேரம் ஊறவைத்து உப்பு, காய்ந்தமிளகாய், பெருங்காயம் சேர்த்து சற்று கரகரப்பாக அரைக்கவும்.
  • தேங்காய்த் துருவல், பொடியாக நறுக்கிய பச்சை மிளகாய், இஞ்சி, கறிவேப்பிலை சேர்த்து லேசாக அழுத்தாமல் கலந்துவைத்துக் கொள்ளவும்.
  • வாணலியில் எண்ணை விட்டு, சிறு உருண்டைகளாக மாவை எடுத்து எண்ணை தடவிய வாழையிலை அல்லது பிளாஸ்டிக் ஷீட்டில் வடைகளாகத் தட்டி எண்ணையில் நிதானமான தீயில் இருபுறமும் சிவக்கப் பொரித்தெடுக்கவும்.

[மேலே இருக்கும் படத்துல் இருப்பவை, நான் ஊறவைத்தபின் கரண்ட் போய்விட்டதால் அதிகம் ஊறி மிக்ஸியில் கொஞ்சம் அதிகம் மாவாகிவிட்டது. இந்த மாதிரி நேரங்களில் சோம்பலைப் பார்க்காமல் கிரைண்டரை உபயோகிப்பது நல்லது. 😦 ]

மேட்ச் ஃபிக்சிங் கார்னர்:

தக்காளிச் சட்னி, கொத்தமல்லிச் சட்னி, கெட்சப்.

தேவையான பொருள்கள்:

துவரம் பருப்பு – 1 கப்
கடலைப் பருப்பு – 1 கப்
உளுத்தம் பருப்பு – 1/4 கப்
காய்ந்த மிளகாய் – 5
பெருங்காயம்
தேங்காய்
கறிவேப்பிலை
உப்பு – தேவையான அளவு

தாளிக்க – எண்ணை, கடுகு, உளுத்தம் பருப்பு.

செய்முறை:

  • பருப்புகளை ஊறவைத்து காய்ந்த மிளகாய், உப்பு, பெருங்காயம் சேர்த்து கரகரப்பாக இட்லிமாவு பதத்தில் அரைத்துக் கொள்ளவும்.
  • மெலிதாகக் கீறிய தேங்காய்த் துண்டுகள், நறுக்கிய கறிவேப்பிலை சேர்க்கவும்.
  • எண்ணையில் கடுகு, உளுத்தம் பருப்பு தாளித்துக் கலக்கவும்.
  • வாணலியில் நன்றாக எண்ணை காய்ந்ததும் சிறு கரண்டியால் எடுத்துவிட்டு மிதமான தீயில் இருபக்கமும் சிவந்ததும் எடுத்துப் பரிமாறவும்.

கூட்டணியில் பிரச்சினை வராமலிருக்க இட்லிவடைக்கு இப்பதிவு சமர்ப்பணம். 

தேவையான பொருள்கள்:

புழுங்கல் அரிசி – 1/2 கப்
கடலைப் பருப்பு – 1/2 கப்
துவரம் பருப்பு – 1/2 கப்
உளுத்தம் பருப்பு – 1/4 கப்
பச்சை மிளகாய் – 5 அல்லது 6
தேங்காய்த் துருவல் – 1/2 கப்
கறிவேப்பிலை
பெருங்காயம்
உப்பு – தேவையான அளவு

தாளிக்க – எண்ணை, கடுகு, உளுத்தம் பருப்பு.

thavalai vadai 1

செய்முறை:

  • அரிசியைத் தனியாகவும், பருப்புகள் எல்லாவற்றையும் தனியாவும் தண்ணீரில் ஊறவைக்கவும்.
  • அரிசி, மிளகாய், உப்பு, பெருங்காயம் இவற்றை சுமாராக அரைத்துக் கொள்ளவும்.
  • அதன்பின் பருப்புகளைச் சேர்த்து மொத்தமாக கரகரப்பாக ஆனால் இட்லிமாவு பதத்திற்கு அரைத்துக் கொள்ளவும்.(ஒரேயடியாக சேர்த்து அரைத்தால் பருப்புகள் அதிகம் மசிந்துவிடும்.)
  • நறுக்கிய கறிவேப்பிலை, தேங்காய்த் துருவலைச் சேர்க்கவும்.
  • சிறிது எண்ணையில், கடுகு, உளுத்தம் பருப்பு தாளித்து அரைத்த மாவில் கலக்கவும்.
  • வாணலியில் எண்ணை விட்டு, காய்ந்ததும், ஒரு சிறு கரண்டியால் மாவை எடுத்துவிடவும்.
  • அடுப்பை நிதானமான சூட்டில் வைத்து, இருபுறமும் சிவந்ததும், எடுத்து சூடாகப் பரிமாறலாம்.

* நிறைய எண்ணை வைத்து ஒரே நேரத்தில் 3, 4 வடைகளாகச் செய்வதை விட கொஞ்சமாக எண்ணை வைத்து ஒவ்வொன்றாகச் செய்தால் நன்றாக வரும். அல்லது ஒரு வடை பாதிக்கு மேல் வெந்தபின் அடுத்த வடைமாவை விடலாம். மாவு தளர்வாக இருப்பதால் ஒன்றுடன் ஒன்று பிரச்சினை ஆகாமல் இருக்க இது உதவும்.