1)

kaththirikkaai-puli_kothsu.JPG


தேவையான பொருள்கள்:

பெரிய கத்திரிக்காய் – 1 (250 கிராம்)
புளி – எலுமிச்சை அளவு
பச்சை மிளகாய் – 4,5
உப்பு –  தேவையான அளவு
கொத்தமல்லித் தழை –  சிறிது
 

தாளிக்க:
காய்ந்த மிளகாய் – 1
கடுகு – 1 டீஸ்பூன்,
உளுத்தம் பருப்பு –  1 டீஸ்பூன்
பெருங்காயம் – 1 சிட்டிகை
கறிவேப்பிலை –  சிறிது

செய்முறை:

  • உள்ளே பூச்சி இல்லாத கத்திரிக்காயை எடுத்துக் கொள்ளவும்.
  • சுற்றிலும் நன்றாக நல்லெண்ணையைத் தடவிக் கொள்ளவும்.
  • அடுப்பை சிம்’மில் வைத்துக் கொண்டு மெதுவாக கத்திரிக்காயை பர்னர் மேலேயே வைத்து வாட்டவும்
  • காம்பைப் பிடித்து ஒவ்வொரு பகுதியாகத் திருப்பி திருப்பி, கத்திரிக்காய் முழுவதும் காய்ந்து, தோல் கருகும் அளவுக்கு மெதுவாகச் சுட வேண்டும். (கத்திரிக்காயைச் சுடுவது, கரிபோட்டு எரிக்கும் கும்முட்டி அடுப்பில் இன்னும் சரியாகவும் சுவையாகவும் வரும்…. ஹூம்!)
  • சுட்டு முடித்ததும் ஆறவைத்து, மெதுவாக மேல்த் தோலை உரிக்கவும். சுலபமாகக் கழண்டுவிடும்.
  • தோலுரித்த கத்திரிக்காயை மேலாக, மென்மையாக, காம்பைப் பிடித்துக் கொண்டு, தண்ணீரில் கழுவவும். ஒட்டிக் கொண்டிருக்கும் கருத்த தோல்பாகங்கள், கருப்புத் துகள்கள் இருந்தாலும் இந்த முறையில் நீக்கிவிட வேண்டும்.
  • இப்போது கத்திரிக்காயின் காம்புப் பகுதியையும் வெட்டி நீக்கிவிடவும்.
  • ஒரு பாத்திரத்தில், சுட்ட கத்திரிக்காய், பொடியாக நறுக்கிய பச்சை மிளகாயைப் போட்டு கையால் நன்கு பிசையவும். [பின்னால் லேசாகக் கை எரியும். தேங்காயெண்ணை துடைத்தால் சரியாகி விடும். :)]
  • புளியை மிகக் கெட்டியான பதத்தில் கரைத்துக் கொண்டு, உப்பு, கத்திரிக்காயுடன் பச்சையாகச் சேர்க்கவும்.
  • எண்ணையைச் சூடாக்கி, காய்ந்த மிளகாய், கடுகு, உளுத்தம் பருப்பு, பெருங்காயம், கறிவேப்பிலை தாளித்துக் கொட்டவும்.
  • மல்லித் தழை சேர்த்துப் பரிமாறவும்.

-0-

(2)

     

    kaththirikkaai.JPG


தேவையான பொருள்கள்:

பெரிய கத்திரிக்காய் – 1
அல்லது
சிறிய கத்திரிக்காய் – 100 கிராம்
பரங்கிக்காய் – சிறிய துண்டு
தக்காளி – 100 கிராம்
சின்ன வெங்காயம் – 15
புளி – நெல்லிக்காய் அளவு
காய்ந்த மிளகாய் – 2
பொட்டுக் கடலை –  1 டேபிள்ஸ்பூன்
மிளகு – 6
மல்லித் தழை –  சிறிய கட்டு
இஞ்சி –  சிறிய துண்டு
மஞ்சள் தூள் –  1 சிட்டிகை
உப்பு – தேவையான அளவு
தாளிக்க – கடுகு, கறிவேப்பிலை

செய்முறை:

  • பெரிய கத்திரிக்காயாக இருந்தால் மேலே இருக்கும் குறிப்பில் சொல்லியிருப்பதுபோல் சுட்டு, உரித்து மசித்துக் கொண்டு, பரங்கிக்காயை மட்டும் நறுக்கிக் கொள்ளலாம்.
  • சிறிய கத்திரிக்காயாக இருந்தால், கத்திரிக்காய், பரங்கி இரண்டையும் பொடிப்பொடியாக நறுக்கிக் கொள்ளவும்.
  • மிளகாய் மிளகு இரண்டையும் வறுத்து பொட்டுக் கடலை, புளி, கொத்தமல்லி சேர்த்து அரைத்துவைத்துக் கொள்ளவும்.
  • வாணலியில் எண்ணை சுடவைத்து, கடுகு, கறிவேப்பிலை தாளித்து, நறுக்கி வைத்துள்ள காய்களை, உப்பு, மஞ்சள் தூள் சேர்த்து வதக்கவும்.
  • தண்ணீர் சேர்த்து வேகவைக்கவும்.
  • வெந்து கொதி வந்தபின், அரைத்து வைத்துள்ள மசாலாவும் சேர்த்து மேலும் ஒரு கொதிவிட்டு, இறக்கவும்.

மேட்ச் ஃபிக்சிங் கார்னர்:

நெய் கலந்த சாதம், இட்லி, பொங்கல் வகைகள்- முக்கியமாக மஞ்ச(ள்)ப் பொங்கல், உப்புமா வகைகள்- முக்கியமாக அரிசி உப்புமா.